الطالبة دعاء القزعة توجه رسالة إلى مصححي امتحانات الثانوية العامة

حرير – وجهت الطالبة دعاء القزعة رسالة إلى مصححي امتحانات الثانوية العامة، ناشدتهم فيها التعامل بمزيد من الاهتمام والإنسانية ومراعاة حالة الطالب النفسية والجسدية خلال جلسات اجابته لامتحان التوجيهي.

وقالت على صفحتها بالفيسبوك، :

الأوراق اللي بين ايديك هي حصاد سنة كاملة من التعب والسهر والقلق والخوف.

اللي بين ايديك مش ورق امتحان. اللي بين ايديك قلوبنا وقلوب أهالينا، أحلامنا الكبيرة، وأول خطوات مستقبلنا.

بدي أحكيلك شوي عن شعوري الآن…

أنا واحد من آلاف الضوء ما انطفا فوقهم من أشهر، ليل نهار حتى تورمت عيوني ووزني نزل ولوني ، لكن بس مسكت ورقة الامتحان هجم علي جيش من الخوف والتوتر، نسيت أشياء كنت حافظها مثل اسمي، وخربطت بأشياء كنت أشرحها لغيري على إنها صدقة العلم متل ما تعلمت.

أحلام كبيرة وقعت في الورقة، وضحكات كتيرة اندفنت فيها، ودموع كتيرة جفت عليها، لهيك بدي ياك تفتش منيح بين الأجوبة عن ركام الأحلام وعن قبر الضحكات وعن ملح الدمعات.

أنا ما عرفت وحسيت مفهوم الخوف إلا ٣ مرات في حياتي، والمرة الرابعة هي هاي، الآن، امتحانات توجيهي، شرطة بالمكان، مراقبين كتير، لجان رايحة ولجان جاية، ترقب، دقات قلب بتتسارع وبتتصارع، أسئلة بعضها تعجيزي، وبعضها خانتني شجاعتي وذاكرتي مع بعض.

عمو/ خالتو…

الطالب اللي ما بيكون مجاوب منيح ما بيكون فاشل. ما بيكون لعوب، ما بيكون مش فاهم مستقبله.

لاااا

لأنه ببساطة ما في حدا بيحب الفشل، بيحب الرسوب، بيحب يشوف إمه وأبوه بيبكوا، بيحب يخذل ثقة الكل ومحبتهم، الفاشل ما بيصمد لياخد قرار دخول التوجيهي، ولكن هادا طالب تعب كتير، وسهر كتير، ودفع فلوس وجهد للدروس كتير، انما اجواء الخوف المحيطة بامتحان توجيهي بتربكه وبتحسسه إنه يوم القيامة هو يوم الامتحان.

هادا الطالب بيستاهل يفرح بيستاهل يوم النتايج يسمع زغاريد أمه ويشوف عيونها ح تطلع من وجهها من الفرحة، بيستاهل يشوف ضحكة أبوه من الخد للخد وفرحة أخواله واعمامه وحبايبه وصحابه، بيستاهل تجيه هدايا وعزومات وطشات.

الشباب التعبانة هاي بتستاهل تفرح مرة بالعمر، لانه بعدها يا عالم إن كانت ح تفرح ولا لا.

أنا ما بحاول أستعطفكم ولكن انا بس باطلب منكم تشوفوا الأمور كاملة من عيون الطالب نفسها لحتى تكونوا عيونه اللي بيشوف فيها وقلبه اللي بيحس فيه وأحلامه اللي بيحلم فيها.

لهيك حنوا علينا ربنا يحن عليكم، وارحمونا ربنا يرحمكم،

توجيهي امل

الطالبة دعاء القزعة