بماذا ينصح الأباء أبناءهم قبل إمتحان التوجيهي ؟؟
حرير – وجه أهالي طلبة نصائح لابنائهم على صفحاتهم بالفيسبوك قبل ساعات من بدء جلسات امتحان الثانوية العامة للعام ٢٠١٩، مستذكرين تجربته في ذلك.
وقد كتب أحمد الأحمد إن علاقته مع أبنائه يحاول ان يخفيها عن السوشال ميديا، ويضيف:
واليوم كتبت كم نصيحة لبنتي عشان امتحانات التوجيهي بكرا
بس بما انه في كتير أهالي بنفس حالتي فحاب أبعت هالنصائح هون ممكن حدا تاني يستفيد منها
حبيبتي ليلى
– الخوف من الامتحان أمر طبيعي أنا لهلا متذكر كيف كان وجهي أصفر والخوف مسيطر على مشاعري لما قدمت التوجيهي
– في حقيقة لازم تعرفيها وهي انه امتحان التوجيهي أسهل من أي امتحان أخدتيه طول السنة
– أنا والعيلة كلنا شفنا كيف انك درستي بجهد وتعبتي. هاي الفترة عدت وانتهت
هلا اجا وقت تصفية الذهن
– لكل شخص فينا قدرة مختلفة عن الكل في التحصيل والإنجاز واحنا ما بهمنا النتيجة ومتقبلينها مهما كانت لأنه مقدرين تعبك
– تفائلي بالخير ووكلي أمرك لله
– خلي أكلنا اليوم وبكرا خفيف ونركز عالفواكه والخضروات واتذكري تشربي مي أكتر من مرة
– اقرأي بعض الآيات والأدعية قبل الامتحان
– عند قراءة الأسئلة حلي الأسئلة السهلة أو المتأكدة من إجابتها واتركي الأسئلة الصعبة للأخير
– تجنبي السهر ونامي على الأأقل 6 ل 8 ساعات
– إذا اعتقدتي أنك نسيتي كل ما درستيه فلا تقلقي
فالكل يشعر بنفس الشئ ستتذكري كل معلومة عندما تحتاجي إليها
– هاي فترة مؤقتة وحتمر وكلنا مرينا فيها واحنا كلنا بنشجعك
– تأكدي أننا نحبك ونفتخر بك دايما وبكل الأحوال
إضافة من الصديق العزيز عمار ابو طربوش:
– و بعد كل امتحان لا تراجعيه و لا تهتمي شو عملتي فيه لانه خلص و اهتمي بالامتحان اللي بعده
– عند الاجابة عل اسئلة الامتحان اي سؤال ما بتعرفي جوابه اتركيه للاخر و جاوبي اللي بتعرفيه و متاكدة من اول
– لا تتركي اي سؤال فاضي من غير اجابة حتى لو غلط
– حاولي تكون الاجابة منطمة و بخط واضح و حافظي على الترتيب في الكتابة
لانه شكل الورقة اذا كان مرتب سيزيد من علامتك لا شعوريا عند المصحح
– لا تخرجي من الامتحان قبل نهاية وقت الامتحان و استغلي اي وقت اضافي متاح في مراجعة الاجابات و التاكد منها
– و لا تخافي كتير لانه التوجيهي مش نهاية العالم و المهم انه الواحد يعمل اللي عليه و يتوكل على الله
إضافة من الصديقة Asma’a Al-Kayalli:
– قبل ما تروح تكون ضبيت الكتاب تبع المادة عشان ما ترجع تفتحه
– وتاخد shower بس ترجع عشان ترتاح شوي وتغير نفسيتها وما تحكي اي شي عن الامتحان الي قدمته
– بس تدرس وتراجع المادة تدعي دعاء الحفظ والنسيان الي انا بدعيه (اللهم الهمني ما حفظت وما لم احفظ وما لمحت وما لم المح وما قرات وما لم اقرا )
– تقرأ كل سؤال وما بتفكر بالاجابة لتخلص قراءة السؤال كامل و بعدين تبدا بالجواب وتعطي كل سؤال حقه
– لما تمسك الورقة تمشي لمحة سريعة ع الاسئلة عشان ترتاح شوي وتشوف طبيعة الاسئلة
– كل سؤال بتحله تحط صح ع ورقة السؤال جنبه والي ما حلته او استصعبته تحط علامة عنده وما تفكر فيه وترجعله بعدين عشان ما ياخد من وقتها
– ترتب الورقة وتكتب بخط واضح السؤال الاول والثاني وهكذا واذا في سؤال كان بآخر الورقة وبدها تكمله بالصفحة الي بعدها وتكون عاملة اشارة وتكتب ورا تابع السؤال كذا
– وبس تسلم ورقتها تدعي انها تكون بايدي امينة والي يصحلها وتستودع الورقة لله
بالتوفيق
إضافة من الصديق Montaser Shalabi:
اذا ممكن إضافة: أثناء مراجعة الإجابات قبل تسليم الورقه * لا تغيّر اي إجابة* لانه الإجابة الاولى التي خطرت على بالك هي أصح أجابة من اي إجابة تخطر على بالك لاحقاً على الاغلب.
