الغالبية في الاردن .. فقراء …

الوضع بالاردن اقتصاديا كثير سيء ، الغالبية الي عايشة على ٤٠٠-٥٠٠ دينار يا دوب قادرة تدبر اكل وشرب لاخر الشهر والخدمات الاساسية زي التعليم والصحة بسبب ترهلها بتزيد العبء على الناس.

الناس بتنزنق على ملاليم، على عشرين وخمسين ليرة بتوقف الدنيا معهم. الغالبية فقراء في الاردن.

الطبقة الوسطى ما عادت معلم او محامي او طبيب. في ظل تدهور الخدمات، الطبقة الوسطى هي الي قادرة تاخد على رواتبها قروض بيوت وسيارات وتودي اطفالها على مدارس خاصة، بمعزل عن نوعية الاخيرة. هدول دخولهم بالضرورة لازم ما تقل عن ١٥٠٠-٢٠٠٠ بأي حال، بس مين بيوخد هيك رواتب بالاردن!؟ غير شرائح محددة من المهندسين والاطباء والمحامين والتجار، طبعا ضيف الهم الناس الي عايشين بفقاعة الاعلام والتمويل الاجنبي وكبار موظفي الحكومة والهيئات المستقلة.

أظن هالفئات مجتمعة ما بتشكل أكثر من ١٥ بالمئة من عموم الناس بالبلد. ولما تفوت على فيس بوك بتلاقي جزء كبير من مجتمع الصحافة والاعلام والنشطاء مشغولين بأسئلة وحوارات لا تمت بصلة للتدهور الي بتعيشه الغالبية!